செய்திகள் உண்மை உடனுக்குடன்

ஆஸ்கர் விருதில் இடம் பெற்ற போர்வீரன்..

Award

அமெரிக்காவின் லாஸ்ஏஞ்சலிஸ் நகரில் உள்ள ஹாலிவுட் ஸ்டுடியோவில் உள்ள டோல்பி தியேட்டரில் ஆண்டுதோறும் ஆஸ்கர் விருது வழங்கும் விழா நடைபெறுகிறது.

உலக அளவில் சினிமாத் துறையில் சாதித்த கலைஞர்களை அங்கீகரிக்கும் இந்த விருதின் அடையாளமாக போர்வீரன் சிலை ஒன்று வழங்கப்படுகிறது. இந்த வழக்கம் 1929ம் ஆண்டில் இருந்து கடைபிடிக்கப்படுகிறது. ஆஸ்கர் விருதுகளை வழங்கும் அகாடெமி ஆஃப் மோஷன் பிக்சர் ஆர்ட்ஸ் அண்ட் சயின்சஸ் அமைப்பு 1927ம் ஆண்டு உருவாக்கப்பட்டது. இந்த அமைப்பு உருவாக்கப்பட்டவுடன் அதன் நோக்கம் மற்றும் கொள்கைகளை வகுப்பதற்காக லாஸ் ஏஞ்சலிஸ் நகரில் உள்ள பில்ட்மோர் உணவகத்தில் ஒரு கூட்டம் நடத்தப்பட்டது. அப்போது திரைகலைஞர்களை கவுரவிக்க ஆண்டுதோறும் விருது ஒன்றினை வழங்க முடிவு செய்யப்பட்டு, அதற்காக ஒரு விருதினை வடிவமைக்க ஒப்புதல் பெறப்பட்டது.

திரைப்படம் எடுக்கப் பயன்படுத்தப்பட்ட பிலிம் ரோல்கள் மீது கையில் வாளுடன் போர் வீரன் நிற்பது போன்ற ஒரு விருதினை எம்ஜிஎம் நிறுவனத்தைச் சேர்ந்த செட்ரிக் கிப்சன் என்பவர் வடிவமைத்தார். இந்த வடிவத்தினை லாஸ் ஏஞ்சலிஸ் நகரைச் சேர்ந்த சிற்பி ஜார்ஜ் ஸ்டேன்லி நிஜமாக்கினார். வெண்கலத்தால் உருவாக்கப்பட்டு தங்க முலாம் பூசப்படும் இந்த விருதுகள் 13.5 இன்ச் உயரமும், 8.5 பவுண்ட் எடையும் கொண்டது. இரண்டாம் உலகப்போரின் போது வெண்கலத்துக்கு ஏற்பட்ட தட்டுப்பாட்டால் 3 ஆண்டுகள் பிளாஸ்டரில் தயாரிக்கப்பட்டு வர்ணம் தீட்டி விருதுகள் வழங்கப்பட்டன. போர் முடிந்த பின்னர் அந்த விருதுகளை தங்க முலாம் பூசப்பட்ட விருதுகளாக ஆஸ்கர் விருது வழங்கும் அமைப்பு மாற்றிக் கொடுத்தது.