செய்திகள் உண்மை உடனுக்குடன்

தாயின் கல்லறையில் அடக்கம் செய்யுங்கள்: 7 வயது சிறுவன் கோரிக்கை

Philip

தனது தாயாரை அடக்கம் செய்த கல்லறையிலேயே, தம்மையும் அடக்கம் செய்யுமாறு கூறியுள்ள, 7 வயது சிறுவனின் கோரிக்கை, சமூக வலைதளங்கள் மூலம், உலகை உலுக்கும் வேண்டுகோளாக மாறியிருக்கிறது.

போலந்து நாட்டைச் சேர்ந்தவர்கள் பியோட் குவாஸ்நீ-அக்னீஸ்கா தம்பதி. இவர்களது திருமணம் 2009ஆம் ஆண்டு நடைபெற்றது. இரண்டு ஆண்டுகளில் தங்க குழந்தையாக, ஃபிலிப் பிறந்தான். அவனுக்கு சற்று விவரம் தெரிய தொடங்கியிருந்த நிலையில், ஃபிலிப்பின் தாயார் அக்னீஸ்கா, புற்றுநோய் பாதிப்பிற்கு ஆளாகி உயிரிழந்தார். தாயின் பிரிவு சிறுவனை அணுகா வண்ணம், அவனது தந்தை பியோடர் வளர்த்து வந்தார்.

இந்த நிலையில், 7 வயதான சிறுவனுக்கு திடீர் உடல் நலக்குறைவு ஏற்பட்டது. இதையடுத்து சிறுவனை சோதித்த மருத்துவர்கள், ஃபிலிப்பிற்கு ரத்த புற்றுநோய் இருப்பதாக கூறினர். அழகுச் சிறுவனாக இருந்த ஃபிலிப்பின் உடல் மெலிய தொடங்கிய நிலையில், லண்டனுக்கு சிகிச்சைக்காக அழைத்து வந்தார் அவனது தந்தை பியோட். லண்டனில் குழந்தைகள் புற்றுநோய் சிகிச்சை மையத்தில் அனுமதிக்கப்பட்டான். இங்கு அவனுக்கு கீமோதெரபி உள்ளிட்ட சிகிச்சை அளித்தும் ரத்த புற்றுநோய் குணமாகவில்லை. இந்த நிலையில், தனது மரணத்தை உணர்ந்திருக்கும் சிறுவன், தான் இறந்தால், தனது தாயாரை அடக்கம் செய்த கல்லறையிலேயே தன்னையும் அடக்கம் செய்யுமாறு கூறினான். இம்மாதம் முதல் வாரத்தில் மருத்துவர்கள் கைவிரித்துவிட, வலி நிவாரணி மாத்திரைகளோடு, இறுதி பயணத்தில் இருக்கிறான் சிறுவன் ஃபிலிப்.

சிறுவனின் இறுதி ஆசையை நிறைவேற்ற அவனது தந்தை பியோட் முடிவு செய்தபோது, அதற்கு 6ஆயிரத்து 500 பவுண்ட் நிதியுதவி தேவைப்பட்டது. இதுகுறித்த தகவல் சமூக வலைதளங்களில், பரவியது. சிறுவனின் இறுதி ஆசையை படித்து உருகிய கொடையாளார்கள், இதுவரை 37 ஆயிரம் பவுண்டு நிதியை வழங்கியுள்ளனர்.